තේරීම් කමිටුව ඇයි තවමත් නිහඬ! ICC විසින් ලබා දී තිබූ කාලය ඊයේ අවසන්!
2026 විස්සයි විස්ස ලෝක කුසලාන ක්රිකට් සැණකෙළියට දින කිහිපයක් පමණක් ඉතිරිව තිබියදී, මුළු මහත් ක්රිකට් ලෝකයේම අවධානය දිනාගත් ශ්රී ලංකා අවසන් සංචිතය පිළිබඳ තීරණාත්මක තොරතුරු කිහිපයක් මේ වන විට කරළියට පැමිණ තිබේ.
අන්තර්ජාතික ක්රිකට් කවුන්සිලය (ICC) විසින් ලෝක කුසලාන සංචිතවල වෙනස්කම් සිදු කිරීම සඳහා ලබා දී තිබූ කාලය ඊයේ (31) මධ්යම රාත්රියෙන් අවසන් වූ අතර, ඒ අනුව ශ්රී ලංකා තේරීම් කමිටුව විසින් ක්රීඩකයින් 15 දෙනෙකුගෙන් යුත් අවසන් සංචිතය තෝරා අවසන් කර ඇති බව වාර්තා වේ. නිල වශයෙන් ශ්රී ලංකා ක්රිකට් ආයතනය මෙතෙක් නිවේදනයක් නිකුත් කර නොමැති වුවත්, අභ්යන්තර ආරංචි මාර්ග සඳහන් කරන්නේ දසුන් ශානකගේ නායකත්වයෙන් යුත් ප්රබල සංචිතයක් මෙවර තරගාවලිය සඳහා නම් කර ඇති බවයි.
මෙම සංචිතයේ විශේෂත්වය වන්නේ පසුගිය කාලසීමාව පුරා දැඩි කතාබහට ලක්වූ දක්ෂ ක්රීඩකයින් කිහිපදෙනෙකුටම අවස්ථාව හිමිව තිබීමයි. ඒ අනුව පැතුම් නිශ්ශංක, කුසල් මෙන්ඩිස්, කුසල් ජනිත් පෙරේරා සහ චරිත් අසලංක වැනි අත්දැකීම් බහුල පිතිකරුවන් සමඟින් කමිඳු මෙන්ඩිස් සහ ජනිත් ලියනගේ වැනි නැගී එන ක්රීඩකයින්ද මෙම ලැයිස්තුවට ඇතුළත් බව පැවසේ. පන්දු යැවීමේ බලඇණිය මතීෂ පතිරණ, දුෂ්මන්ත චමීර සහ ඒෂාන් මාලිංගගෙන් සමන්විත වන අතර, වනිඳු හසරංග, මහීෂ් තීක්ෂණ සහ දුනිත් වෙල්ලාලගේ දඟපන්දු බලකාය මෙහෙයවනු ඇත.
පසුගිය දිනවල පැතිර ගිය කටකතාවලට තිත තබමින් කමිල් මිෂාර සහ පවන් රත්නායක යන යොවුන් ක්රීඩකයින්ටද මෙවර ලෝක කුසලාන වරම් හිමිව ඇති බවයි වාර්තා වන්නේ. සත්කාරක රටක් ලෙස ශ්රී ලංකාව මෙවර කුසලානය දිනාගැනීමේ දැඩි බලාපොරොත්තුවකින් පසුවන අතර, මෙම තීරණාත්මක සංචිතය පිළිබඳ නිල නිවේදනය ඉදිරි පැය කිහිපය තුළ නිකුත් වනු ඇතැයි ක්රීඩාලෝලීන් මහත් කුතුහලයෙන් බලා සිටියි.
