පාකිස්ථානයේ හදිසි තීරණය, ජාත්යන්තර ක්රිකට් කවුන්සිලය (ICC) රත් කරයි! ක්රිකට් ජීවගුණයට හානියක්
2026 විස්සයි-20 ලෝක කුසලාන තරගාවලිය ආරම්භ වීමටත් පෙරම ක්රිකට් ලෝකය උඩුයටිකුරු කරමින් පාකිස්ථානය ගත් මතභේදාත්මක තීරණයකට ජාත්යන්තර ක්රිකට් කවුන්සිලය (ICC) සිය දැඩි විරෝධය පළ කර තිබේ. රජයේ මැදිහත්වීම මත පාකිස්ථාන කණ්ඩායම ලෝක කුසලාන තරගාවලිය සඳහා “තෝරාගත් අයුරින්” සහභාගී වීමට තීරණය කිරීම, ක්රිකට් ක්රීඩාවේ ජීවගුණයට මෙන්ම තරගාවලියේ අඛණ්ඩතාවයට එල්ල වූ මරු පහරක් බවයි ICCය අවධාරණය කරන්නේ.
මෙම අර්බුදයට ප්රධානතම හේතුව වී ඇත්තේ 2026 මාර්තු 15 වැනිදා කොළඹදී පැවැත්වීමට නියමිත ඉන්දියාවට එරෙහි තීරණාත්මක ලෝක කුසලාන තරගයට පාකිස්ථාන කණ්ඩායම සහභාගී නොවන බවට එරට රජය නිල වශයෙන් නිවේදනය කිරීමයි.
අනෙකුත් සියලුම තරග සඳහා ක්රීඩා කළද, ඉන්දියාව සමඟ පැවැත්වෙන තරගය පමණක් වර්ජනය කිරීමට පාකිස්ථානය ගත් මෙම හදිසි පියවර ගෝලීය ක්රිකට් මූලධර්මවලට පටහැනි බව ICCය පෙන්වා දෙයි.
ලෝක කුසලානය වැනි ප්රමුඛ පෙළේ තරගාවලියකදී සුදුසුකම් ලැබූ සියලුම කණ්ඩායම් සමාන කොන්දේසි යටතේ ක්රීඩා කළ යුතු බවත්, පාකිස්ථානයේ මෙම “තෝරාගත් ක්රීඩා විලාසය” මිලියන සංඛ්යාත ක්රිකට් ලෝලීන්ගේ අපේක්ෂාවන් සුන් කිරීමක් බවත් ICCය සිය නිවේදනය මගින් පවසා තිබේ. එමෙන්ම මෙවැනි ක්රියාමාර්ග හරහා පාකිස්ථාන ක්රිකට් ක්රීඩාවට මෙන්ම සමස්ත ගෝලීය ක්රිකට් පද්ධතියටම දිගුකාලීන අහිතකර බලපෑම් ඇතිවිය හැකි බවටද අනතුරු ඇඟවීම් නිකුත් කර ඇත.
පවතින උණුසුම්කාරී තත්ත්වය සමනය කර ගැනීම සඳහා සියලුම පාර්ශවයන්ට පිළිගත හැකි එකඟතාවයකට පැමිණෙන ලෙස පාකිස්ථාන ක්රිකට් පාලක මණ්ඩලයෙන් (PCB) ඉල්ලා සිටින ICCය, තරගාවලිය සාර්ථක කර ගැනීමට සහය වන ලෙසද වැඩිදුරටත් දන්වා සිටියි.
පාකිස්ථානයේ මෙම දැඩි ස්ථාවරය හමුවේ ඉන්දියා – පාකිස්ථාන ලෝක කුසලාන මහා සංග්රාමයේ අනාගතය කුමක් වනු ඇත්දැයි ලොව පුරා ක්රීඩාලෝලීන් දැඩි කුතුහලයෙන් බලා සිටියි.
