ලෝක කුසලානයේ සත්කාරකයින් අසීරු අඩියක!රතු එළියක්!

2026 විස්සයි විස්ස ලෝක කුසලාන ක්‍රිකට් තරගාවලියේ සුපිරි 8 දෙනාගේ වටය අතිශය තීරණාත්මක මෙන්ම විස්මිත පෙරළි රැසක් සිදුවන වටයක් බවට පත්ව තිබේ. ඊයේ දිනයේ සිම්බාබ්වේ කණ්ඩායමට එරෙහිව ලකුණු 107ක දැවැන්ත ජයක් වාර්තා කළ බටහිර ඉන්දීය කොදෙව් කණ්ඩායම, පළමු කාණ්ඩයේ පෙරමුණ තහවුරු කරගැනීමට සමත් විය. ප්‍රසාද ලකුණු 2ක් සමඟින් +5.350ක අතිවිශාල ශුද්ධ දළ ලකුණු වේගයක් පවත්වාගෙන යන කොදෙව්වන් මේ වන විට අනෙකුත් කණ්ඩායම්වලට දැඩි පීඩනයක් එල්ල කරමින් සිටී.

එම කාණ්ඩයේම දෙවන ස්ථානය දකුණු අප්‍රිකාව සතු කරගෙන ඇති අතර, ලෝක කුසලාන සිහිනය දකින ප්‍රබල ඉන්දීය කණ්ඩායමට මෙවර හිමිව ඇත්තේ තෙවන ස්ථානය වීම විශේෂත්වයකි. ඉන්දියාවට අවසන් පූර්ව වටයේ බලාපොරොත්තු ජීවත් කරවීමට නම් ඉදිරියේදී සිම්බාබ්වේ සහ කොදෙව් කණ්ඩායම් සමඟ පැවැත්වෙන තරග දෙකම අනිවාර්යයෙන්ම ජයග්‍රහණය කළ යුතු මට්ටමට තරගාවලිය උණුසුම් වී ඇත.

මේ අතර, සුපිරි 8 වටයේ දෙවන කාණ්ඩය දෙස බලන විට එංගලන්ත කණ්ඩායම සිය ආධිපත්‍යය පතුරුවමින් පෙරමුණේ පසුවේ. නවසීලන්තය දෙවන ස්ථානයත්, පාකිස්ථානය තෙවන ස්ථානයත් හිමිකරගෙන සිටින අතර,

අවාසනාවන්ත ලෙස ශ්‍රී ලංකා කණ්ඩායමට එම කාණ්ඩයේ අවසන් ස්ථානය දක්වා පසුබැසීමට සිදුව තිබේ. ප්‍රේමදාස ක්‍රීඩාංගණයේදී මව්බිමේ ප්‍රේක්ෂකයින් ඉදිරියේ අවසන් පූර්ව තරගයකට ක්‍රීඩා කිරීමට නම් ශ්‍රී ලංකා කණ්ඩායම මෙම පසුබැසීමෙන් මිදී ඉදිරි තරගවලදී ප්‍රබල පුනරාගමනයක් කළ යුතුමය.