අපි හැමෝගෙම බලාපොරොත්තු සුන් උනා – මුම්බායි හිමිකාරිනි නීටා අම්බානී
පස්වතාවක් ඉන්දීය ප්‍රීමියර් ලීග් ශූරතාව දිනාගත් මුම්බායි ඉන්දියන්ස් කණ්ඩායමේ අයිතිකරු නීටා අම්බානි මහත්මිය මෙවර අයිපීඑල් තරගාවලිය ‘බලාපොරොත්තු සුන් කරවූ‘ ව්‍යාපාරයක් වූ බව කණ්ඩායමේ ක්‍රිකට් ක්‍රීඩකයින් අමතමින් කියා සිටියාය.
වන්කඩේ ක්‍රීඩාංගණයේ පැවති ඔවුන්ගේ අවසන් ලීග් තරගයේදී ලක්නව් සුපර් ජයන්ට් කණ්ඩායමට එරෙහිව පරාජයෙන් පසුව, බලයලත් හිමිකරු නීටා අම්බානි කණ්ඩායම ඇමතුවාය. මෙම තරග වාරය බලාපොරොත්තු සුන් කළද, 2025 වාරය සඳහා වන ක්‍රීඩක වෙන්දේසියට පෙර කාර්ය සාධන සමාලෝචනයක් කළ යුතු බව පිළිගත් ඇය මුම්බායි ඉන්දියන්ස් ජර්සිය ඇඳීම වරප්‍රසාදයක් බව පැවැසුවාය.
“අපි හැමෝගේම බලාපොරොත්තු සුන් වූ සමයක්. අපට අවශ්‍ය ආකාරයට දේවල් සිදු නොවුණත් මම තවමත් මුම්බායි ඉන්දියන්ස් කණ්ඩායමේ විශාල රසිකයෙක්. අයිතිකරුවෙක් පමණක් නොවේ. මම හිතන්නේ මුම්බායි ඉන්දියන්ස් ජර්සිය ඇඳීම විශාල ගෞරවයක් සහ වරප්‍රසාදයක්. මුම්බායි ඉන්දියන්ස් සමඟ සම්බන්ධ වීමට ලැබීම මට ගෞරවයක් සහ වරප්‍රසාදයක්. අපි ආපසු හැරී සමාලෝචනයක් කළ යුතුයි ”අම්බානි මහත්මිය පැවැසුවාය.
60 හැවිරිදි ඇය විසින් බටහිර ඉන්දීය කොදෙව් සහ ඇමරිකා එක්සත් ජනපදයේ ආරම්භ වන විස්සයි20 ලෝක ක්‍රිකට් තරගාවලියට යන ක්‍රීඩකයින්ට වාසනාව ප්‍රාර්ථනා කළාය.
