දිනෙන් දින ඉහළ යන පියයුරු පිළිකා පිළිබඳ දැනුම්වත් කිරීමට දඹුලු පිල හා ගාලු පිල හෙට රෝස පැහැයෙන් වර්ණවත් වෙයි
එල්පීඑල් තරගාවලිය යටතේ හෙට (14) ගෝල් පිලට එරෙහිව පැවැත්වෙන තරගයේදී දඹුල්ල සික්සර්ස් ක්‍රීඩකයෝ රෝස පැහැති ඇඳුමකින් සැරසී තරග බිමට පිවිසීමට නියමිතය. මෙරට තුළ දිනෙන් දින ඉහළ යන පියයුරු පිළිකා පිළිබඳ දැනුම්වත් කිරීම සහ ප්‍රචාරණය කිරීමේ වැඩසටහනට සහයෝගයදීම මෙන්ම මූලික අවධියේදීම පිළිකා හඳුනා ගැනීම සඳහා අවධානය යොමු කිරීම, ස්වයං පරීක්ෂාවන් දිරිගැන්වීමට වැඩි අවධානයක් ලබාදීම මීට හේතුව වී ඇත.
මෙලෙස රෝස පැහැයෙන් සැරසීමෙන් ස්වයං පියුරු පරීක්ෂාව මඟින් එම රෝගී තත්ත්වය කලින් හඳුනා ගැනීම ප්‍රවර්ධනය කිරීම ද මෙහි අරමුණක් වී ඇති අතර, ක්‍රිකට් ක්‍රීඩා කරන රටවල විවිධ කණ්ඩායම් ද මෙලෙස සිදු කර තිබිණි.
මින් පෙර තරගවලදී කහ සහ නිල් මිශ්‍ර ඇඳුමකින් ක්‍රීඩා කළ දඹුලු ක්‍රීඩකයෝ මේ අනුව රෝස පැහැති ජර්සියකින් සැරසී රෝස පැහැති අත් පටියක් බැඳ තරග කිරීමට නියමිතය.
මේ අතර මේ කාර්යයට සහයෝගය ලබාදෙන බව ගෝල් මාව්ල්ස් කණ්ඩායම ද නිවේදනය කර තිබේ. ඒ අනුව ඔවුන්ගේ කොළ පැහැයෙන් යුතු ඇඳුමට රෝස පැහැය එක් කර ගැනීමට කටයුතු කර ඇත.
මේ කාර්යයට සහයෝගය දැක්වීම සඳහා හෙට තරගය නැරඹීමට පැමිණෙන ක්‍රීඩා ලෝලීන්ටත් ක්‍රීඩාංගණ පරිශ්‍රයේදී රෝස පැහැති ටීෂර්ටයක් මිල දී ගැනීමට අවස්ථාව සලසා ඇති අතර, එමඟින් ඔවුන්ට ද මෙයට දායකත්වය දීමට හැකියාව ලැබේ.
මින් ලැබෙන සියලු මුදල් පිළිකා රෝගීන් වෙනුවෙන් ඇති අරමුදල වෙත පරිත්‍යාග කිරීමට නියමිතය.
