විස්සයි20 ලෝක කුසලාන තරගාවලිය නියෝජනය කරන ක්‍රීඩකයෝ 32ක් LPL හා එක්වීමට නියමිතයි
තවත් දින 4කින් ආරම්භ වන ලංකා ප්‍රිමියර් ලීග් (එල්පීඑල්) ක්‍රිකට් තරගාවලිය සඳහා මේ දිනවල පැවැත්වෙන විස්සයි20 ලෝක කුසලාන තරගාවලිය නියෝජනය කරන ක්‍රීඩකයෝ 32ක් ඇතුළත්ව සිටිති.
ඒ අතරින් 19ක් ශ්‍රී ලාංකික ක්‍රීඩකයන් වන අතර ඉතිරි 13 දෙනා විදෙස් රටවල ක්‍රීඩකයෝ වෙති. ඒ අතරින් වැඩිම සහභාගිත්වයක් ඇෆ්ගනිස්තානය නියෝජනය කරමින් පැමිණෙන අතර, එම සංඛ්‍යාව 6කි. ඒ අතරින් එහි ආරම්භක පිතිකරු රාමනුල්ලා ගුර්බාස් කැපී පෙනෙනම ක්‍රීඩකයා බවට පත්ව සිටින්නේ ඇෆ්ගනිස්තානය ලෝක කුසලාන අවසන් පූර්ව වටයට ගෙන යන ගමනේදී ඔස්ට්‍රේලියාවට (60) සහ බංග්ලාදේශයට (43) එරෙහිව පිත්තෙන් දැක්වූ දස්කම් හේතුවෙනි.
ඊට අමතරව මුජීබ් උර් රෙහ්මාන් (ගාල්ල), ඊබ්‍රහිම් සද්‍රාන් සහ මොහොමඩ් නබී (දඹුල්ල) මෙන්ම නූර් අහමඩ් (ජැෆ්නා) කැපී පෙනෙන ක්‍රීඩකයෝ වෙති. බංග්ලාදේශයෙන් ටස්කින් අහමඩ්, මුස්තෆිසූර් රහ්මාන් සහ ටව්හිද් රිඩෝයි එක් වෙති. එල්පීඑල් වෙන්දේසියේදී ටව්හිද් රිඩෝයිව මිල දී ගැනීමට කිසිදු කණ්ඩායමක් ඉදිරිපත් නොවුණද පසුව ඔහුගේ සේවය ලබා ගැනීමට දඹුල්ල කණ්ඩායම තීරණය කර තිබේ.
නවසීලන්තයෙන් ග්ලෙන් පිලිප්ස් සහ මාක් චැප්මන්, පාකිස්තානු කණ්ඩායමේ උප නායකයා වන ශඩාබ් ඛාන් සහ දකුණු අප්‍රිකාවේ රීසා හෙන්ඩ්‍රික්ස් මෙවර එල්පීඑල් තරගාවලිය නියෝජනය කරන විදෙස් තරු බවට පත්ව සිටිති.
මේ ක්‍රීඩකයන් අතරින් කිසිදු ක්‍රීඩකයකු කැන්ඩි කණ්ඩායමට ක්‍රීඩා නොකිරීම කැපී පෙනෙන සිදුවීමකි. කෙසේ වෙතත් කැන්ඩි කණ්ඩායම ජාතික කණ්ඩායම නියෝජනය කරන දක්ෂතම ක්‍රීඩකයන්ගෙන් සැදුම් ලත් කණ්ඩායමක් වන අතර, ඔවුන් අතර ශ්‍රී ලංකා පිල මෙහෙයවීමට වරම් ලද නායකයින් පස්දෙනකුම ඇතුළත්වීම කැපී පෙනෙයි.
කලම්බු – සදීර සමරවික්‍රම, ශාඩාබ් ඛාන් (පාකිස්තානය), ග්ලෙන් පිලිප්ස් (නවසීලන්තය), දුනිත් වෙල්ලාලගේ, රාමනුල්ලා ගුර්බාස් (ඇෆ්ගනිස්තානය), ටස්කින් අහමඩ් (බංග්ලාදේශය), මතීෂ පතිරණ.
දඹුල්ල – ඩිල්ෂාන් මදුශංක, නුවන් තුෂාර, මුස්තෆිසූර් රහ්මාන් (බංග්ලාදේශය), ඊබ්‍රහිම් සද්‍රාන් (ඇෆ්ගනිස්තානය), රීසා හෙන්ඩ්‍රික්ස් (දකුණු අප්‍රිකාව), මාක් චැප්මන් (නවසීලන්තය), ටව්හිඩ් රිඩෝයි (බංග්ලාදේශය), මොහොමඩ් නබී (ඇෆ්ගනිස්තානය).
ගාල්ල – භානුක රාජපක්ෂ, මහීෂ් තීක්ෂණ, ජනිත් ලියනගේ, මුජීබ් උර් රෙහ්මාන් (ඇෆ්ගනිස්තානය).
ජැෆ්නා – චරිත් අසලංක, විජයකාන්ත් වියස්කාන්ත්, කුසල් මෙන්ඩිස්, අස්මාතුල්ලා ඔමරසායි (ඇෆ්ගනිස්තානය), නූර් අහමඩ් (ඇෆ්ගනිස්තානය), ධනංජය ද සිල්වා, අසිත ප්‍රනාන්දු, පැතුම් නිශ්ශංක.
කැන්ඩි – වනිඳු හසරංග, දුෂ්මන්ත චමීර, කමිඳු මෙන්ඩිස්, ඇන්ජලෝ මැතිව්ස්, දසුන් ශානක.
