සවුදි අරාබියෙන් විස්සයි 20 තරඟාවලියක් ඇරඹෙන ලකුණු.
අමෙරිකානු ඩොලර් මිලියන 500ක ආයෝජනයක් සමඟ ජාත්‍යන්තර ක්‍රිකට් පිටියට නව විස්සයි20 ලීග් තරගාවලියක් හඳුන්වා දීමට සවුදි අරාබිය සැලසුම් කරමින් සිටින බව ඔස්ට්‍රේලියාවේ සිඩ්නි මෝනිං හැරල්ඩ් පුවත් සේවය වාර්තා කළේය. නිව් සවුත්වේල්ස් සහ වික්ටෝරියා ප්‍රාන්තයේ හිටපු තුන්ඉරියව් ක්‍රීඩකයකු වන නීල් මැක්ස්වෙල්ගේ අදහසකට අනුව වසරකට වැඩි කාලයක් මේ පිළිබඳ සවුදි බලධාරීන් සහ මැක්ස්වෙල් අතර රහසිගතව සාකච්ඡා පවත්වා ඇතැයි ද සිඩ්නි මෝනිං හැරල්ඩ් පුවත් සේවය වැඩිදුරටත් වාර්තා කළේය.
සවුදි අරාබියේ එස්ආර්ජේ ක්‍රීඩා ආයෝජන සමාගම විසින් ප්‍රධාන අනුග්‍රාහකත්වය සැපයීමට නියමිත නව විස්සයි20 ලීග් තරගාවලියට මෙතෙක් නමක් තබා නැති අතර, තරගාවලිය පිළිබඳ ජාත්‍යන්තර ක්‍රිකට් කවුන්සිලය සමඟ දැනටමත් සාකච්ඡා ආරම්භ කර ඇතැයි ද වාර්තා වේ. එම තරගාවලියට රටවල් 8ක් නියෝජනය වන පරිදි කණ්ඩායම් 8ක් තරග වැදීමට සැලසුම් කර ඇති අතර, තරගාවලිය ග්‍රෑන්ඩ් ස්ලෑම් ටෙනිස් ශූරතාවලිය මෙන් වසර පුරා ස්ථාන 4ක පැවැත්වීමට සැලසුම් කර තිබේ. වාර්ෂික ජාත්‍යන්තර ක්‍රිකට් කැලන්ඩරය සැලකිල්ලට ගෙන එහි ඇති ඉඩකඩ අනුව තරගාවලිය වසර පුරා පැවැත්වීමටත්, ජාත්‍යන්තර සහ දේශීය තරගවලටත්, අයිපීඑල් සහ බිග්බෑෂ් වැනි ලීග් තරගවලටත් බලපෑමක් නොවන පරිදි පැවැත්වීමටත් සැලසුම් කර ඇතැයි වාර්තා වේ.
තරගාවලියට සහභාගි වන කණ්ඩායම් ඔස්ට්‍රේලියාව ඇතුළු එක් එක් රටවල් අතරින් තෝරාගැනීමටත්, කාන්තා හා පිරිමි දෙඅංශයටම තරගාවලිය පැවැත්වීමටත් අවධානය යොමුවී ඇති අතර, අවසන් මහා තරගය සවුදි අරාබියේ පැවැත්වීමට සැලසුම් කර තිබේ.
