අධ්‍යාපනය සම්පූර්ණ කිරීම ක්‍රීඩකයකු කළ යුතුයි. වයස අවුරුදු 60 දක්වා අපිට ක්‍රිකට් සෙල්ලම් කරන්න බෑ – ඉන්දියානු ක්‍රීඩක අයියර් දොසතර විභාගයට සැරසේ
ක්‍රිකට් ලෝකයේ අධ්‍යාපනයට මෙන්ම ක්‍රීඩාවටත් දස්කම් දක්වන ක්‍රීඩකයින් සිටින්නේ ඉතා ස්වල්ප දෙනෙකි. ඉන්දීය ක්‍රිකට් ක්‍රීඩක වෙන්කටේෂ් අයියර් ඒ ස්වල්ප දෙනා අතුරින් එක් අයෙකු වේ. ඉන්දීය ප්‍රිමියර් ලීග් ඉතිහාසයේ සිවුවැනි මිල අධිකම ක්‍රීඩකයා ලෙස ඉන්දීය රුපියල් කෝටි 23.75කට (ශ්‍රී ලංකා රුපියල් කෝටි 81.19ක්) කොල්කටා නයිට් රයිඩර්ස් පිල මිලට ගත් වෙන්කටේෂ් අයියර් ව්‍යාපාර පරිපාලන උපාධිය සම්පූර්ණ කොට දැන් මූල්‍ය කටයුතු පිළිබඳ ආචාර්ය උපාධිය හදාරමින් සිටින බව ඉන්දියන් එක්ස්ප්‍රස් පුවත්පත ඊයේ අනාවරණය කළේය.
වෙන්කටේෂ් අයියර් ඉන්දියන් එක්ස්ප්‍රස් වෙත ලබා දුන් සම්මුඛ සාකච්ඡාවකදී කියා සිටියේ ක්‍රීඩාව සමඟ අධ්‍යාපනයත් එකසේ වැදගත් වන බවයි.
උසස් අධ්‍යාපනය කඩිසරව කරගෙන යන ඔහු ක්‍රීඩාව කිසිවිටෙක අධ්‍යාපන කටයුතුවලට බාධාවක් නොවන බව නූතන ලෝකයට ඉගැන්වූ විශාල පාඩමකි. බොහෝ මවුපියන් මෙන්ම ගුරුවරුන්ද දරුවන් ක්‍රීඩාවෙන් ඈත් කර අධ්‍යාපන කටයුතු සඳහා වැඩි වශයෙන් දිරි ගැන්වීමේ සංස්කෘතිය වෙනස් කළ යුතු බව වෙන්කටේෂ් අයියර් කියාදුන් ආදර්ශය වේ.
“අධ්‍යාපනය සම්පූර්ණ කිරීම ක්‍රීඩකයකු කළ යුතුයි. වයස අවුරුදු 60 දක්වා අපිට ක්‍රිකට් සෙල්ලම් කරන්න බෑ. ක්‍රිකට් ක්‍රීඩාව කෙටි කාලයකට පමණක් ඇති දෙයක් බව අප තේරුම් ගත යුතුයි. ඉන්පසු ජීවිතයේ යමක් කිරීමට අවශ්‍ය නම් අධ්‍යාපනය වැදගත් වෙනවා. මට හැමදාම ක්‍රිකට් ක්‍රීඩාව ගැන හිතන්න ඕන නෑ. මේක පීඩනය වැඩි කරනවා” අයියර් පැවසීය. වයස අවුරුදු 29ක් වූ වෙන්කටේෂ් අයියර් ඉන්දියාව වෙනුවෙන් එක්දින තරග හා විස්සයි20 තරග නියෝජනය කළේය.
“මම මධ්‍යම පාන්තික පවුලකින් පැමිණි කෙනෙක්. මම අධ්‍යාපනයෙන් හොඳ දියුණුවක් ලබමින් සිටියත් මගේ මවුපියන්ට අවශ්‍ය වුණේ ක්‍රිකට් ක්‍රීඩාවේ යෙදෙනවා දකින්නයි. මට එකපාරටම දේවල් දෙකක් කරන්න පුළුවන් නම්, මම ඒවා කරන්න කැමතියි. මම හිතන්නේ ක්‍රිකට් ක්‍රීඩකයන්ට ක්‍රිකට් දැනුම විතරක් නෙවෙයි සාමාන්‍ය දැනුමත් තියෙන්න ඕනෑ. ඔබට උපාධිය හෝ පශ්චාත් උපාධිය සම්පූර්ණ කළ හැකි නම්, ඔබ එය අනිවාර්යයෙන්ම කළ යුතුයි. ඊළඟ වතාවේ ඔබ සම්මුඛ සාකච්ඡාව කරන්න වෙන්නේ Dr. වෙන්කටේෂ් අයියර් සමඟ බව මතක තබාගන්න” ඉන්දියන් එක්ස්ප්‍රස් මාධ්‍යවේදියාට ඔහු පැවසීය.
