කරුණාව-දයාව වගේම ක්‍රීඩකයන්ට විශ්වාසය දුන්නා – ශ්‍රි ලංකා පුහුණුකරු සනත් ජයසූරිය
ශ්‍රී ලංකා ක්‍රිකට් කණ්ඩායම තුළ වර්තමානයේ විනය අංක එකට ඇති බවත්, එයට අමතරව ක්‍රීඩකයන් වෙතට කරුණාව හා දයාව නොඅඩුව ලබාදී ඇතැයි ශ්‍රී ලංකා කණ්ඩායමේ ප්‍රධාන පුහුණුකරු සනත් ජයසූරිය මහතා පවසයි. මෙවැනි දේ තුළින් ශ්‍රී ලංකා ක්‍රිකට් කණ්ඩායම සාර්ථක ගමනකට පිවිස ඇතැයි ජයසූරිය මහතාගේ අදහස වේ.
“මා පුහුණුකරු වුණාට පසු ලොකු දෙයක් කරලා නෑ. පොඩි පොඩි දේවල් ටිකක් කළා. මොකද මේ ඉන්නේ පොඩි කාලේ ඉඳලා ක්‍රිකට් ගහපු අය. මේ අය දන්නවා කළ යුතු දේ මොකක්ද කියලා. ඔවුන්ට අවශ්‍ය විශ්වාසය දුන්නා. කරුණාව, දයාව ඔවුන්ට අවශ්‍යයි. හොඳ විනයක් අවශ්‍යයි. මේ ඔක්කොම එකතු වුණාම හොඳ ප්‍රතිඵල ලැබෙනවා. අපි හොඳ ගමනක් යනවා” ජයසූරිය මහතා පැවසීය.
ඒ මහතා මේ බව පැවසුවේ තවත් දින 6කින් ආරම්භ වන ශ්‍රී ලංකා – දකුණු අප්‍රිකා ටෙස්ට් තරගාවලිය පිළිබඳ ඊයේ ශ්‍රී ලංකා ක්‍රිකට් ආයතනයේ පැවති මාධ්‍ය හමුවේදීය.
