ශ්‍රී ලංකා ක්‍රිකට් කණ්ඩායම මේ 28 සිට නවසීලන්තයේ තරඟ සංචාරයකට එක්වේ.
සීමිත ඕවර තරග සංචාරයකට එක්වීම සඳහා ශ්‍රී ලංකා ක්‍රිකට් කණ්ඩායම මේ මස අග භාගයේදී නවසීලන්තය බලා පිටත්ව යෑමට නියමිතය. එහිදී ශ්‍රී ලංකාව සහ නවසීලන්තය අතර තරග 3 බැගින් සමන්විත විස්සයි20 සහ එක්දින තරගාවලි දෙකක් පැවැත්වීමට නියමිතය.
දෙපිල අතර විස්සයි20 තරගාවලිය ආරම්භ කරමින් පළමු තරගය මේ මස 28 වැනිදා මවුන්ට් මුන්ගුනායිහි බේ ඕවල් පිටියේදී පැවැත්වේ. දෙවැනි තරගයත් බේ ඕවල් පිටියේදීම පැවැත්වෙන්නේ මේ මස 30 වැනිදාය. ලබන වසර ආරම්භ කරමින් තරගාවලියේ අවසන් විස්සයි20 තරගය ලබන මස 2 වැනිදා නෙල්සන්හිදී පැවැත්වෙන අතර, එක්දින තරගාවලිය 5 වැනිදා වෙලිංටන්හිදී ආරම්භ වෙයි. දෙවැනි සහ තෙවැනි තරග පිළිවෙළින් ජනවාරි 8 සහ 11 දිනවල පැවැත්වෙන්නේ හැමිල්ටන් සහ ඔක්ලන්ඩ්වලදීය.
ශ්‍රී ලංකා පිල අවසන් වරට පසුගිය වසරේ අප්‍රේල් මස නවසීලන්තයේ සංචාරයක නිරත වූ අතර, එහිදී තරග 3කින් සමන්විත විස්සයි20 තරගාවලිය 2-1ක් ලෙසත්, තරග 3කින් සමන්විත එක්දින තරගාවලිය 2-0ක් ලෙස ජය ගැනීමට නවසීලන්තය සමත් විය.
තරග කාලසටහන
දෙසැ. 28 පළමු විස්සයි20 තරගය
(මවුන්ට් මුන්ගුනායිහිදී)
දෙසැ. 30 දෙවැනි විස්සයි20 තරගය
(මවුන්ට් මුන්ගුනායිහිදී)
ජන. 2 තෙවැනි විස්සයි20 තරගය
(නෙල්සන්හිදී)
ජන. 5 පළමු එක්දින තරගය
(වෙලිංටන්හිදී)
ජන. 8 දෙවැනි එක්දින තරගය
(හැමිල්ටන්හිදී)
ජන. 11 තෙවැනි එක්දින තරගය
(ඕක්ලන්ඩ්හිදී)
