ඉතිහාසයේ පළමු වරට ඇෆ්ගනිස්තානය සුපිරි 8ට
ඇෆ්ගනිස්තාන ක්‍රිකට් කණ්ඩායම ඉතිහාසයේ පළමු වරට විස්සයි20 ලෝක කුසලාන තරගාවලියක සුපිරි 8 වටයට එක්වීමේ අවස්ථාව පෙරේදා උදාකර ගත්තේය.
පැපුවා නිව්ගිනියාව සමඟ ට්‍රිනිඩෑඩ්හි පැවති තරගාවලියේ 29 වැනි තරගයෙන් ඇෆ්ගනිස්තානය කඩුලු 7ක ජයක් හිමි කර ගත් අතර, ඒ සමඟ බටහිර ඉන්දීය කොදෙව් පිලට පසු ‘සී’ කාණ්ඩයෙන් සුපිරි අට වටයට එක්වූ දෙවැනි රට බවට ඇෆ්ගනිස්තානය පත් විය.
2010 වසරේ පළමු වරට විස්සයි20 ලෝක කුසලාන තරගාවලියකට එක්වූ ඇෆ්ගනිස්තානය තෙවරක් පළමු වටයෙන් ඉවතට විසිවූ අතර, ශ්‍රේණිගත කිරීම්වල ඉදිරියෙන් සිටීම හේතුවෙන් අවසන් වරට පැවති තරගාවලි ත්‍රිත්වයේදී කෙළින්ම දෙවැනි වටයට එක්විය.
මේ තරගයේ පළමුව පන්දුවට පහරදුන් පැපුවා නිව්ගිනියා පිල ඕවර 19.5කදී ලකුණු 95කට සීමා කළ ඇෆ්ගන් ක්‍රීඩකයෝ ඕවර 15.1කදී ජය තහවුරු කර ගත්තේ කඩුලු 3ක් පමණක් අහිමි කර ගනිමිනි.
ගුල්බදීන් නයිබ් පන්දු 36කදී හතරේ පහර 4ක් සහ හයේ පහර 2ක් සමඟ නොදැවී ලකුණු 49ක් රැස් කරමින් ඇෆ්ගන් පිල ජයග්‍රහණය කරා ගෙන ගියේය.
පළමුව පන්දුවට පහරදුන් පැපුවා නිව්ගිනියා ඉනිමේ මුල් කඩුලු 7 ලකුණු 50ක් තුළ බිඳ වැටුණු අතර, කිප්ලින් ඩොරිගා ලකුණු 27ක් රැස් කරමින් ඉනිමේ වැඩිම ලකුණුලාභියා විය. පන්දු යැවීමේදී ෆසල්හක් ෆාරුකි කඩුලු 3ක් සහ නවීන් උල් හක් කඩුලු 2ක් දවා ගත්හ.
