චැම්පියන්ස් කුසලාන ක්‍රිකට් තරගාවලිය ශ්‍රී ලංකාවේ පවත්වන්න – ඉන්දියාව අයිසීසීයෙන් ඉල්ලයි
එළඹෙන චැම්පියන්ස් කුසලාන ක්‍රිකට් තරගාවලිය මධ්‍යස්ථ රටක් ලෙස ශ්‍රී ලංකාවේ පැවැත්වීම සඳහා ඉන්දීය ක්‍රිකට් ආයතනය අයිසීසීයෙන් ඉල්ලීම් කරයි. ශ්‍රී ලංකාවේ පැවැත්වීමට නොහැකි නම් චැම්පියන්ස් කුසලාන ක්‍රිකට් තරගාවලිය එක්සත් අරාබි එමීර් රාජ්‍යයේ ඩුබායි වෙත රැගෙන යන ලෙස එම ලිඛිත ඉල්ලීමේ සඳහන් වේ.
චැම්පියන්ස් කුසලාන ක්‍රිකට් තරගාවලියේ සත්කාරකත්වය මෙවර පාකිස්තානයට පැවරී ඇති අතර, දේශපාලනික හේතුමත ඉන්දියාව පාකිස්තානය බලා ගමන් නොගන්නා බැවින් මේ ඉල්ලීම කර ඇත. ඉන්දීය ජාතික ක්‍රිකට් කණ්ඩායම ලබන පෙබරවාරි 19 වැනිදා සිට මාර්තු 9 වැනිදා දක්වා පැවැත්වීමට නියමිත චැම්පියන්ස් කුසලාන තරගාවලිය වෙනුවෙන් පාකිස්තානයට නොයන බව ඉන්දීය ක්‍රිකට් පාලක මණ්ඩලයේ පැවැති රැස්වීමකදී සාකච්ඡාවී ඇත.
තරගාවලියට කණ්ඩායම් 8ක් සහභාගි වන අතර, සියලු තරග ලාහෝර්, රාවල්පින්ඩි සහ කරච්චි නුවරදී පැවැත්වීමට කටයුතු යොදා ඇති බව දැනටමත් නිවේදනය කර ඇත.
මෙයට පෙර ආසියානු කුසලාන ක්‍රිකට් තරගාවලිය පැවැත්වීමට නියමිතව තිබූ පාකිස්තානයේ තරගවලට ඉන්දියාව සහභාගී නොවීම හේතු මත එම තරග ශ්‍රී ලංකාවේ පැවැත්විණි. ඒ ආකාරයෙන්ම එළඹෙන චැම්පියන්ස් කුසලාන ක්‍රිකට් තරගාවලිය ශ්‍රී ලංකාවේ පවත්වනු ඇතැයි ඉන්දීය ක්‍රිකට් ආයතනයේ අපේක්ෂාව වී තිබේ.
මෙවර තරගාවලියට පාකිස්තානය, ඇෆ්ගනිස්තානය, ඔස්ට්‍රේලියාව, බංග්ලාදේශය, එංගලන්තය, ඉන්දියාව, නවසීලන්තය හා දකුණු අප්‍රිකාව සහභාගි වෙයි.
