ක්‍රිකට් තරගයක් පවත්වාගෙන ක්‍රීඩාංගණ භාර සේවකයන් කරන්නෙ මිල කළ නොහැකි සේවයක් – ශ්‍රී ලංකා එක්දින ක්‍රිකට් නායක චරිත් අසලංක
“ලෝකෙ වැඩියෙන්ම මහන්සි වෙන ක්‍රීඩාංගණ භාර සේවකයින් ඉන්නේ ශ්‍රී ලංකාවේ. නමුත් ඔවුන්ටත් කරන්න අමාරු කොටසක් තියෙනවා. වර්ෂාවෙන් තෙත් වුණාම යළි ක්‍රීඩාංගණය වේළනවා කියන එක හරිම අමාරු වැඩක්. ඒ වගේ වේලාවක බෝලය තෙත් වුණාම පන්දු යවන්නන්ට අමාරුයි පන්දු යවන්න. විශේෂයෙන්ම දඟ පන්දු යවන්නන්ට අමාරු වෙනවා. යාර 30න් එළියට පන්දුව ගියාම පන්දුව තෙත් වෙනවා“ අසලංක සඳහන් කළේය.
පල්ලේකැලේ ජාත්‍යන්තර ක්‍රීඩාංගණයේ පසුගියදා පැවැති එක්දින ජාත්‍යන්තර තරග තුනේදීම වරින් වර වර්ෂාව පතිතවී තරගයට බාධා ගෙන දුනනේය. එවිට වහාම ක්‍රියාත්මක වූ ක්‍රිකට් ක්‍රීඩාංගණ භාර සේවකයින් ඕවර් කිහිපයක් හෝ ක්‍රීඩා කිරීම වෙනුවෙන් විශාල පරිශ්‍රමයක් දැරීම කාගේත් ප්‍රශංසාවට බඳු විය. වැස්සට තෙමී, අව්වට වේළී ක්‍රිකට් තරග පවත්වා ගැනීම වෙනුවෙන් බලවත් පරිශ්‍රමයක් දරන පල්ලේකැලේ ක්‍රීඩාංගණයේ සේවකයින් 130ක් පමණ සිටිති.
