“මගේ ළඟ මේ වෙලාවේ ශ්‍රී ලංකා කැප් එකක් නෑ, නමුත් මම කියනවා ශ්‍රී ලංකාව ලෝක කුසලානය ජයග්‍රහණය කරනවා කියලා” – එළඹෙන විස්සයි-20 ලෝක කුසලානය ගැන පළමු අනාවැකිය මහේලගෙන්.!
පකිස්තානු කණ්ඩායම පරාජයට පත් කරමින් ශ්‍රී ලංකා කණ්ඩායම ආසියානු කුසලානය ජයග්‍රහණය කිරීමට සමත්කම් දැක්වීම කාගෙත් අවධානයට ලක්වූ කරුණක් විය. ආසියානු කුසලානය හා එළඹෙබ ලෝක කුසලාන තරඟාවලියට එක්වන ශ්‍රී ලංකා කණ්ඩායම පිලිබඳව ශ්‍රී ලංකා කණ්ඩායමේ උපදේශකවරයා වන මහේල ජයවර්ධන සංජනා ගනේශන් මෙහෙයවන ICC Review වැඩ සටහනට එක්වෙමින් කියා සිටියේය.
“පසුගිය විස්සයි-20 ලෝක කුසලානයේ දී සහ දැන් ආසියානු කුසලානයේ දී ඔවුන් ලබා ගත් දේ පිළිබඳ විශ්වාසය ඔවුන් ගන්නවා නම්, මම හිතන්නේ සෑම පැත්තකින්ම ඔවුන් ගොස් ලෝක කුසලානය දිනනවා හැරෙන්නට වෙන කිසිවක් දෙස බලන එකක් නෑ,”
“මම අදහස් කළේ එහිදී සතු විය යුතු ආකල්පය පිලිබඳවයි. කණ්ඩායමක් වශයෙන් ඔවුන් මත කිසිදු බියක් නොමැතිව ක්‍රීඩා කරනු ඇතැයි මට හැඟෙනවා. එබැවින් එහි ගොස් ඔවුන්ගේ ක්‍රිකට් රසවිඳිමින් ක්‍රීඩා කරන්නට ඔවුන්ට පුලුවන්”
“නොවැම්බර් මාසයේදී ඔවුන් ඕස්ට්‍රේලියාවේ විස්සයි-20 සංචාරය කරන විට ඔවුන් හොඳින් ක්‍රීඩා කළා. ඔවුන් ඇත්තටම හොඳින් දස්කම් දැක්වූවා. ඒ නිසා ඔවුන් ඒ සියල්ල සැලකිල්ලට ගත්තොත්, මම හිතන්නේ ඔවුන් දැන් හොඳ අවකාශයක ඉන්නවා.”
පළමු තරඟය පරාජයවෙමින් ආසියානු කුසලාන ගමන් මගට පිවිසි ශ්‍රී ලංකා කණ්ඩායම අවසන් තරඟ පහම ජයගමින් ශූරයින් බවට පත්විය. සමස්ත තරඟාවලිය පුරාවටම ඔවුන් සාර්ථක ඒකකයක් ලෙස කැපී පෙනුණි. කණ්ඩායම බොහෝ කලක් සොයමින් සිටි විශ්වාසය මෙවර තරඟාවලියේදී ඔවුන් සතුවූ බව මහේලගේ අදහස වූවා.
“මම හිතන්නේ කවුරුවත් ඔවුන්ට තරඟාවලිය ජයග්‍රහණය කිරීමේ අවස්ථාව ලබා දුන්නේ නැහැ, නමුත් පුද්ගලිකව, ඔවුන්ට හැකියාවන් ඇති බව මම දැන සිටියා. ඔවුන් දොරට තට්ටු කරමින් සිටියා. ඔවුන්ට අවශ්‍ය වුණේ මම හිතන්නේ ඒ විශ්වාසය පමණයි. ඔබ දන්නවා ඔවුන් එය ලබා ගත් පසු ඔවුන් දක්ෂ ක්‍රිකට් ක්‍රීඩා කළා. මම හිතන්නේ ඔවුන්ට සුපිරි තරු නැහැ, හැබැයි එය කණ්ඩායම් ප්‍රයත්නයක්. හැමෝම ඇතුළට ගියා. ”
ලෝක කුසලානය ආරම්භ වන්නට පෙර ශ්‍රී ලංකාවට මෙල්බර්න්හිදී පුහුණු තරග දෙකකට එක්වීමට නියමිතය. සිම්බාබ්වේ කණ්ඩායමට හා අයර්ලන්තයට එරෙහිව පුහුණු තරඟ දෙකකින් අනතුරුව ශ්‍රී ලංකා කණ්ඩායම පිවිසෙන්නේ නැමීබියාව, නෙදර්ලන්තය සහ එක්සත් අරාබි එමීර් රාජ්‍යයට එරෙහිව පැවැත්වෙන පළමු වටයේ තරඟ සඳහාය. එය ශ්‍රී ලංකා කණ්ඩායම ලබන අතිරේක වාසියක් විය හැකි බව මහේල පවසා සිටියේය.
“ලෝක කුසලානයේ ආරම්භය ඔවුන්ට ඉතා තීරණාත්මක වනු ඇත, මන්ද ඔවුන් වේගය ලබා ගැනීමට සහ තත්වයන්ට හැඩගැසීමට අවශ්‍ය බැවිනි,නමුත් ඔවුන්ට එය කිරීමට හැකි බව මට විශ්වාසයි.”
එම වැඩසටහන පහතින්
