සිංහයන් හා භාරත පුතුන්ගෙ පලමු විස්සයි20 සටන අද රෑ 7.00ට පල්ලෙකැලේදී ඇරඹේ.
![](http://i0.wp.com/sixcricket.com/wp-content/uploads/2024/06/sl-vs-ind.jpg?fit=1200%2C675&ssl=1)
ශ්රී ලංකා කණ්ඩායම සහ සංචාරක ඉන්දීය ක්රිකට් කණ්ඩායම අතර තරග 3කින් සමන්විත විස්සයි20 ක්රිකට් තරගාවලිය අද (27) රාත්රි 7.00ට පල්ලෙකැලේ ජාත්යන්තර ක්රිකට් ක්රීඩාංගණයේදී ආරම්භ වෙයි.
මේ දෙපිලම නායකත්වයෙන් සහ පුහුණුකාරිත්වයෙන් වෙනස්කම් සමඟින් තරග බිමට පිවිසෙන අතර, චරිත් අසලංක ශ්රී ලංකා කණ්ඩායම මෙහෙයවන්නේ පළමු වරටය. සූර්යකුමාර යාදව් මින් පෙර පසුගිය වසරේ තරග 7කදී ඉන්දීය පිල මෙහෙයවා ඇති අතර,
ඉන් තරග 5ක් ඉන්දියාව ජය ගනිද්දී තරග 2ක් පරාජය වී තිබේ. කෙසේ වෙතත් ඔහු ශ්රී ලංකාවට එරෙහිව නායකත්වය දෙන පළමු අවස්ථාව මෙයයි.
හිටපු සුපිරි ක්රිකට් ක්රීඩක සනත් ජයසූරිය ශ්රී ලංකා කණ්ඩායමේ වැඩබලන පුහුණුකරු ලෙසත්, ගෞතම් ගාම්භීර් ඉන්දීය කණ්ඩායමේ නව පුහුණුකරු ලෙසත් මේ තරගාවලියට එක්වෙති.
ජාත්යන්තර විස්සයි20 පිටියේදී මේ දෙරට 29 වරක් හමුව ඇති අතර, ඉන් තරග 19ක් ඉන්දියාව ජය ගනිද්දී ශ්රී ලංකාව ජයගෙන ඇති තරග සංඛ්යාව 9කි.
මේ දෙපිල අවසන් වරට පසුගිය වසරේ ජනවාරි මස ඉන්දියාවේ සත්කාරකත්වයෙන් හමුවූ අතර, එහිදී තරග 3-2ක් ලෙස ඉන්දියාව ජය වාර්තා කළේය.
කෙසේ වෙතත් ද්වීපාර්ශ්වික තරගාවලියකින් දෙපිල අවසන් වරට මෙරටදී හමුවූයේ 2021 වසරේදීය. එහිදී තරග 3-2ක් ලෙස ජය ගත්තේ ශ්රී ලංකාවයි. ඉන් පසු ශ්රී ලංකාව විස්සයි20 තරගාවලියක් ජයගෙන නැත.
මේ තරගාවලියට 15 දෙනකුගෙන් සමන්විත සංචිතයක් නම් කළ අතර, අසනීප තත්ත්වයක් හේතුවෙන් වේග පන්දු යවන දුෂ්මන්ත චමීරත්, ආබාධයක් හේතුවෙන් නුවන් තුෂාරටත් සංචිතයෙන් ඉවත් වීමට සිදුවූ අතර ඒ වෙනුවට අසිත ප්රනාන්දු සහ ඩිල්ෂාන් මධුෂංක සංචිතයට ඇතුළත් වූහ.
ශ්රී ලංකාව නිමා වූ ලෝක කුසලාන තරගාවලියේදී මූලික වටයෙන් ඉවත් වූ අතර, පළපුරුදු පිතිකරුවන් වන කුසල් ජනිත් පෙරේරා, දිනේෂ් චන්දිමාල් කණ්ඩායමට කැඳවීමත් නව නායකයාට ශක්තියක් වනු ඇත.
ඉන්දියාව මේ තරගාවලියට එක් වන්නේ වත්මන් විස්සයි20 ලෝක ශූරයන් ලෙසිනි. එම තරගාවලියෙන් අනතුරුව ජගත් පිටියට සමුදුන් නායක රෝහිත් ශර්මා, විරාට් කෝලි සහ රවින්ද්ර ජඩේජා සමඟ ජස්ප්රීට් බුම්රා ද මේ සංචිතයට එක්ව නැති අතර, කෙසේ වෙතත් සෙසු ක්රීඩකයන් තම ස්ථාන රැක ගැනීම වෙනුවෙන් මේ තරගාවලියේදී සටන් වදිනු ඇත.
ඉන්දීය පිල ලෝක කුසලාන තරගාවලියෙන් පසු සිම්බාබ්වේ පිලට එරෙහිව විස්සයි20 තරගාවලියකට එක්වූ අතර, එය තරග 4-1ක් ලෙස ජය ගත්තේය. කෙසේ වෙතත් ඊට ලෝක කුසලානයට ක්රීඩා කළ ක්රීඩකයන් එක් නොවිණි.
දෙරට අතර තරග 3කින් සමන්විත විස්සයි20 තරගාවලියේ දෙවැනි තරගය හෙට (28) පැවැත්වෙන අතර, අවසන් තරග 30 වැනිදා පැවැත්වේ. මේ තරග දෙකත් පල්ලෙකැලේ ක්රීඩාංගණයේදීම රාත්රි 7.00ට ආරම්භ වෙයි.
ශ්රී ලංකා විස්සයි20 සංචිතය – චරිත් අසලංක (නායක), පැතුම් නිශ්ශංක, කුසල් ජනිත් පෙරේරා, අවිශ්ක ප්රනාන්දු, කුසල් මෙන්ඩිස්, දිනේෂ් චන්දිමාල්, කමිඳු මෙන්ඩිස්, දසුන් ශානක, වනිඳු හසරංග, දුනිත් වෙල්ලාලගේ, මහීෂ් තීක්ෂණ, චමිඳු වික්රමසිංහ, බිනුර ප්රනාන්දු, අසිත ප්රනාන්දු, ඩිල්ෂාන් මධුෂංක.
ඉන්දීය විස්සයි20 සංචිතය – සූර්යකුමාර් යාදව් (නායක), ශුබ්මන් ගිල්, යසෂ්වි ජයිස්වාල්, රින්කු සිං, රියාන් පරාග්, රිෂාබ් පාන්ට්, සංජු සැම්සන්, හර්දික් පාණ්ඩ්යා, ශිවම් ඩූබේ, අක්සර් පටෙල්, වොෂිංටන් සුන්දර්, රවි බිෂ්නෝයි, අර්ෂදිප් සිං, කලීල් අහමඩ්, මොහොමඩ් සිරාජ්.