වනිඳු තුන් ඉරියව්වෙන් යළිත් අංක එකට එයි
ජාත්‍යන්තර ක්‍රිකට් කවුන්සිලය නිකුත් කළ නවතම විස්සයි20 ක්‍රීඩක ශ්‍රේණිගත කිරීම් අනුව යළිත් වරක් තුන් ඉරියව් ක්‍රීඩකයන් අතරේ පෙරමුණ හිමි කර ගැනීමට ශ්‍රී ලංකා විස්සයි20 නායක වනිඳු හසරංග සමත්ව තිබේ.
ලෝක කුසලාන තරගාවලිය ආරම්භ වීමට පෙර එහි පෙරමුණ ගැනීමට වනිඳු සමත්ව සිටියත්, එම තරගාවලියේදී දස්කම් දැක්වීමට අසමත් වීම හේතුවෙන් ඔහු පහතට වැටුණු අතර, අංක එක ඇෆ්ගනිස්තාන කණ්ඩායමේ මොහොමඩ් නබිට හිමි විය. තරග 3ක් ක්‍රීඩා කළ වනිඳු කඩුලු 6ක් දවාගත් අතර, දෙවරක් ලකුණු නොලබා දැවී ගිය ඔහු එක් තරගයකදී ලකුණු 20ක් රැස් කළේය.
කෙසේ වෙතත් තරගාවලිය පුරා දස්කම් ප්‍රදර්ශනය කිරීමට නොහැකි වීම නිසා නබි යළි දෙවැනි ස්ථානය දක්වා පහත බැස ඇත්තේ වනිඳුට පෙරමුණ දෙමිනි.
ඉන්දීය පිලේ හර්දික් පාණ්ඩ්යා ස්ථාන 4ක් ඉදිරියට එමින් තෙවැනි තැන අත්කර ගැනීම කැපී පෙනෙන අතර, ස්ථාන 3ක් පහළ වැටුණු ඔස්ට්‍රේලියාවේ මාකස් ස්ටොයිනිස් සිව්වැනි තැන සිටී.
මින් පෙර අවස්ථාවකදී වනිඳු සමඟ සමව පෙරමුණ ගෙන සිටි බංග්ලාදේශයේ ශකීබ් අල් හසන්ට නවතම ශ්‍රේණිගත කිරීම් අනුව හිමිව ඇත්තේ 6 වැනි ස්ථානයයි. වනිඳුට අමතරව තුන් ඉරියව් ක්‍රීඩකයන් අතර ඉදිරියෙන් පසුවන ශ්‍රී ලාංකිකයා වන්නේ හිටපු නායක දසුන් ශානකය. ඔහුට හිමිව ඇත්තේ 14 වැනි තැනයි.
විස්සයි20 පන්දු යවන්නන් අතර ස්ථාන 2ක් ඉදිරියට එමින් දෙවැනි තැනට පත්වීමට ඇෆ්ගන් නායක රෂීඩ් ඛාන් සමත්ව ඇති අතර, එංගලන්තයේ අදිල් රෂීඩ් සහ වනිඳු හසරංග පිළිවෙළින් පළමු සහ තෙවැනි ස්ථාන රැක ගෙන තිබේ.
ශ්‍රී ලංකා පිලේ මහීෂ් තීක්ෂණ ස්ථානයක් ඉහළට පැමිණිය ද ඔහු දකුණු අප්‍රිකාවේ ඇන්රිච් නොර්ට්ජේ සමඟින් සමව 9 වැනි තැන සිටී.
