වසර 70කට පසු කොදෙව් කණ්ඩායමට අවු. 17ක ක්‍රීඩකයෙක්!
ශ්‍රී ලංකාවට එරෙහි තෙවැනි හා අවසන් එක්දින තරගයට ක්‍රීඩා කළ 17 හැවිරිදි ජුවෙල් ඇන්ඩෲ ඔහුගේ මංගල ජාත්‍යන්තර තරගයට ක්‍රීඩා කළේ සර් ගාෆීල්ඩ් සෝබර්ස්ගෙන් පසු එවැනි වයසේ ක්‍රිකට් ක්‍රීඩකයෙකුගේ සම්ප්‍රාප්තිය වාර්තා පොතට එක් කරමිණි. ගාෆීල්ඩ් සෝබර්ස්ගෙන් පසුව කොදෙව් කණ්ඩායමට ක්‍රීඩා කරන පළමු 17 හැවිරිදි ක්‍රීඩකයා බවට කඩුලු රකින පිතිකරු ජුවෙල් ඇන්ඩෲ පත්වූ අතර, වයස අවුරුදු 17 හෝ ඊට අඩු ක්‍රීඩකයෙක් බටහිර ඉන්දීය කොදෙව් ක්‍රිකට් කණ්ඩායම නියෝජනය කරන්නේ වසර 70ක කාලයක් ඇතුළත ප්‍රථම වතාවට වීම මෙහි ඇති විශේෂත්වය වේ.
ක්‍රිකට් පුරාවෘත්තයක් වන සර් ගාෆීල්ඩ් සෝබර්ස් ප්‍රථම වතාවට කොදෙව් කණ්ඩායම නියෝජනය කළේ 1954 වසරේ මාර්තු 30 වැනිදා එංගලන්තයට එරෙහිව කිංස්ටන් හි දීය. එවිට ඔහුගේ වයස අවුරුදු 17යි දවස් 245ක්වූ අතර, ඇන්ඩෲ බටහිර ඉන්දීය කොදෙව් පිල නියෝජනය කරද්දී වයස වයස අවුරුදු 17යි දවස් 324ක් වුවේය.
වයසින් අඩුම ක්‍රීඩකයා සෝබර්ස් නොව අවුරුදු 17යි දවස් 122 වයසේදී එංගලන්තය ට එරෙහිව බ්‍රිජ්ටවුන් හි දී 1930 වසරේ ජනවාරි 11 වැනිදා ක්‍රීඩා කළ ඩෙරික් සීලි වේ.
