ලෝක කාන්තා ක්‍රිකට් කිරුළ දිනූ නවසීලන්තය, ශ්‍රි ලංකා පපරේ තාලයට නටමින් කෝටි 69 රැගෙන යයි
විස්සයි20 කාන්තා ලෝක කුසලාන ක්‍රිකට් තරගාවලියේ අවසන් මහතා තරගයේදී දකුණු අප්‍රිකානු කණ්ඩායම ලකුණු 32කින් පරාජය කර ශූරතාව දිනාගැනීමට නවසීලන්තය සමත් විය.
ඒ අනුව කාන්තා ක්‍රිකට් ඉතිහාසයේ නවසීලන්තය ජයග්‍රහණය කළ පළමු ලෝක කුසලානය ලෙස මෙය වාර්තා අතරට එක්විය.
කණ්ඩායම් 10ක සහභාගිත්වයෙන් සති කිහිපයක් පුරා එක්සත් අරාබි එමීර් රාජ්‍යයේ පැවති මෙම තරගාවලියේ අවසන් මහා තරගය ඊයේ (20) රාත්‍රියේදී ඩුබායිහිදී පැවැත්විණි.
මෙහිදී නවසීලන්තයෙන් හිමි වූ ලකුණු 159ක ඉලක්කයට පිළිතුරු ලෙස දකුණු අප්‍රිකානු ක්‍රීඩිකාවන්ට පන්දුවාර 20 තුළදී කඩුලු 9ක් දැවී රැස්කළ හැකිවූයේ ලකුණු 126ක් ක් පමණි.
විස්සයි20 කාන්තා ලෝක කුසලාන ඉතිහාසයේ නවසීලන්තය අවසන් මහා තරගයක් ක්‍රීඩාකළ තෙවැනි අවස්ථාව මෙයයි.
ඔවුන් මීට පෙර 2009 හා 2010 වර්ෂයන්හි අවසන් මහා තරගය ක්‍රීඩාකළද, එම දෙවතාවේදීම අනුශූරතාවෙන් සෑහීමට සිදුවිය.
ඩුබායි ජාත්‍යන්තර ක්‍රීඩාංගණයේ ඊයේ පැවති අවසන් මහා තරගයේදී දකුණු අප්‍රිකාව ලකුණු 32කින් පැරදවූ නවසීලන්තය ලෝක ශූරතාව සමඟ අමෙරිකානු ඩොලර් මිලියන 2.34ක තෑගි මල්ල (ශ්‍රී ලංකා රුපියල් කෝටි 69ක) දිනා ගත්තේය. ඩොලර් මිලියන 1.17ක (ශ්‍රී ලංකා රුපියල් කෝටි 35ක්) මුදල් තෑග්ග අනුශූර දකුණු අප්‍රිකාවට හිමි විය.
