“මේ අභියෝගාත්මක කාලයේදීත් ශ්‍රී ලංකාව ජාත්‍යන්තර ක්‍රිකට් ක්‍රීඩා කළ යුතුයි” – පකිස්ථානය ශ්‍රී ලංකාව වෙනුවෙන් ඉදිරියට එයි.!
ශ්‍රී ලංකා ක්‍රිකට් කණ්ඩායමට සහ ශ්‍රී ලංකා ක්‍රිකට් ආයතනයට සහය වීමට අවස්ථාවක් ඉල්ලා පකිස්ථානයේ ශ්‍රී ලංකා මහ කොමසාරිස් වෙත ලිපියක්.
ආසියාවේ දෙවන ධනවත්ම ක්‍රිකට් ලීගය වන පකිස්තානු සුපර් ලීග් තරඟාවලියේ ප්‍රමුඛතම කණ්ඩායමක් වන පෙෂාවර් සල්මි කණ්ඩායමේ සභාපති ජාවෙඩ් අෆ්රිඩි විසින් ශ්‍රී ලංකා මහකොමසාරිස් වරයා වෙත ඉල්ලීමක් කරමින් ලිපියක් යොමුකර ඇත.
එම ලිපියේ අදහස් දක්වන ජාවේඩ් ඉල්ලා සිටින්නේ ශ්‍රී ලංකා ක්‍රිකට් කණ්ඩායමට හා ක්‍රිකට් ආයතනයට සහය වීමට තමන් හට අවසාථාවල් ලබා දෙන ලෙසය.
ජාවේඩ් අෆ්රිඩී මීට දින කිහිපයකට පෙරදී තම ට්විටර් ගිණුම ඔස්සේද කාරුණික සටහක් තබමින් මේ බව සඳහන් කර සිටියේය.
“හිතවත් මහත්මයාණෙනි, මම ලියන්නේ මේ සමාජ ආර්ථික නොසන්සුන්තාවයේ අඳුරු හෝරාවේ ශ්‍රී ලංකා ජාතික ක්‍රිකට් කණ්ඩායමට මගේ සහයෝගය ලබා දීමටයි. ක්‍රීඩාවේ ප්‍රබල උපදේශකයෙකු ලෙස, මට හැඟෙන්නේ අපි ශ්‍රී ලංකා ක්‍රිකට් කණ්ඩායමට සම්බන්ධ වී ඔවුන්ට අවශ්‍ය උපකාර ලබා දිය යුතු බවයි. ශ්‍රී ලංකා ක්‍රිකට් කණ්ඩායමේ ජාත්‍යන්තර තත්ත්වය පවත්වාගෙන යාමට සහය දැක්වීමට, අනුග්‍රහය දැක්වීමට සහ උපකාර කිරීමට මගේ අභිප්‍රාය පිළිබඳව මම මෑතකදී ට්විටර් පණිවුඩයක් ද නිකුත් කළෙමි.
ක්‍රිකට් වලට මිනිස්සුන්ට බලාපොරොත්තුවක් දීලා ඔවුන්ව එකතු කරන්න බලය තියෙනවා. ශ්‍රී ලංකාවේ ක්‍රිකට් ලෝලීන්ට සහ සාමාන්‍ය ජනතාවට ඕනෑම විපතක් ජය ගැනීමට හැකියාවක් ඇති බවට තමන් ගැන විශ්වාසයක් අවශ්‍ය වේ. මෙම අර්බුදයෙන් ගොඩ ඒමට ඔවුන්ට කාර්යක්ෂමතාවත් අවශ්‍ය වේවි.
එබැවින් ශ්‍රී ලංකා ක්‍රිකට් කණ්ඩායම මෙම අභියෝගාත්මක කාලවලදී ජාත්‍යන්තර ක්‍රිකට් ක්‍රීඩා කළ යුතුය. ශ්‍රී ලංකාවේ ජාතික කණ්ඩායමේ සෑම ක්‍රීඩකයෙක්ම ජාතික අභිමානයයි. ඔවුන් පිටියේ දස්කම් දක්වන ආකාරය නැරඹීමෙන් ශ්‍රී ලංකාවේ ජනතාවට මෙම දුෂ්කරතාවයට එරෙහිව නැගී සිටීමට ඔරොත්තු දීමේ හැකියාව සහ නොපසුබට උත්සාහය ලැබෙනු ඇත. ලොව පුරා ක්‍රිකට් ක්‍රීඩාවේ දක්ෂතා උද්‍යෝගයෙන් ප්‍රවර්ධනය කරන කෙනෙකු ලෙස, මෙම ඉල්ලුම පවතින කාලය තුළ ශ්‍රී ලංකා ක්‍රිකට් දක්ෂතා අහිමි වුවහොත් එය විශාල පාඩුවක් වනු ඇතැයි මම තරයේ විශ්වාස කරමි.
ජාතික ශ්‍රී ලංකා ක්‍රිකට් කණ්ඩායමට සහයෝගය දැක්වීමට සහ අනුග්‍රහය දැක්වීමට අපට අවසර දෙන මෙන් ශ්‍රී ලංකාවේ නිසි බලධාරීන්ගෙන් සහ පාකිස්තානයේ අදාළ බලධාරීන්ගෙන් මම ඉල්ලා සිටිමි. මීට අමතරව, ශ්‍රී ලංකාවේ ජනතාවට උපකාර කිරීමේ තවත් මාර්ග සාකච්ඡා කිරීමට අපි විවෘතව සිටිමු.
මම ඉක්මන් පිළිතුරක් ඇසීමට බලාපොරොත්තු වෙමි.” යනුවෙන් ඔහු තම ලිපියේ සඳහන් කරන්නේය.
විටෙක ලාහෝර් ප්‍රහාරය නිසා ලෝකයේ සෙසු කණ්ඩායම් පකිස්තානයේ තරඟ සංචාර ප්‍රතික්ෂේප කරද්දී පකිස්තානු ස්වදේශීය ජනතාවට උර දීමට ශ්‍රී ලංකා ක්‍රීඩකයෝ කටයුතු කලෝය. ශ්‍රී ලංකා ක්‍රීඩකයෝ පකිස්තානය ක්‍රිකට් තරඟ සංචාරයන් සඳහා සුදුසු රටක් බව එදා පෙන්නුම් කලේය.එම මිත්‍රත්වයේ හස්තයම මෙවර ක්‍රීඩාව තුලින්ද ඔවුන් අපට දිගු කිරීම ප්‍රශංසනීය ය.
Javed Afridi මහතා තැබූ ට්විටර් සටහන පහතින්,
අපි පකිස්තාන් ජාතිකයන් තරමටම ක්‍රිකට් ක්‍රීඩාවේ මිනිසුන් ආදරය කරන නමුත් වර්තමාන තත්ත්වය එතරම් යහපත් නොවීම ලංකා ක්‍රිකට් ලෝලීන්ගේ වේදනාවට හේතු වන්නට ඇත. ඒ නිසා මම මගේ උපරිම හැකියාවෙන් @OfficialSLC අනුග්‍රහය දැක්වීමට මගේ පූර්ණ සහයෝගය ලබා දෙනවා. pic.twitter.com/D0HjwXFd1y
— Javed Afridi (@JAfridi10) May 14, 2022
