කාන්තා විස්සයි20 ලෝක කුසලාන සුදුසුකම් ලැබීමේ සටන ඇරඹේ – පළමු තරගය අද ශ්‍රී ලංකාව සහ තායිලන්තය අතර
මේ වසරේ පැවැත්වීමට නියමිත කාන්තා විස්සයි20 ලෝක කුසලාන ක්‍රිකට් තරගාවලියට එක්වන අවසන් කණ්ඩායම් දෙක තෝරා ගැනෙන සුදුසුකම් ලැබීමේ තරගාවලිය අඩුබාඩිහිදී අද (25) ශ්‍රී ලංකාව සහ තායිලන්තය අතර තරගයෙන් ආරම්භ වෙයි. මේ තරගය ශ්‍රී ලංකා වේලාවෙන් පස්වරු 4.30ට ටොලරන්ස් ඕවල් පිටියේදී පැවැත්වේ.
කණ්ඩායම් 10ක් එක්වන තරගාවලියේ මූලික වටය කාණ්ඩ දෙකකින් පැවැත්වෙන අතර එක් කණ්ඩායමක් තරග 4කට ක්‍රීඩා කළ යුතු වෙයි. තරග 20කින් සමන්විත එම වටය මැයි 3 වැනිදා දක්වා ටොලරන්ස් ඕවල් සහ සෙයිඩ් ක්‍රිකට් ක්‍රීඩාංගණවලදී පැවැත්වේ. අනතුරුව ප්‍රසාද ලකුණු සටහනේ පෙරමුණ ගන්නා කණ්ඩායම් දෙක බැගින් මැයි 5 වැනිදා අවසන් පූර්ව වටයේ තරග වදින අතර අවසන් මහ තරගය මැයි 7 වැනිදා පැවැත්වේ. අවසන් වටයේ තරග සෙයිඩ් ක්‍රිකට් ක්‍රීඩාංගණයේදී පැවැත්වේ.
මෙහිදී ශ්‍රී ලංකා පිල ‘ඒ’ කාණ්ඩයෙන් තරග වදින අතර අමෙරිකාව, තායිලන්තය, උගන්ඩාව සහ ස්කොට්ලන්තය එම කාණ්ඩයට ඇතුළත් වෙයි.
මේ තරගාවලියට එක්වන කණ්ඩායම් අතුරින් ඉදිරියෙන්ම පසුවන කණ්ඩායම ශ්‍රී ලංකාව වන අතර මේ වන විට අයිසීසී විස්සයි20 ශ්‍රේණිගත කිරීම්වල 7 වැනි ස්ථානය හිමිව තිබේ. පාකිස්තානය සහ බංග්ලාදේශය ඊට පහළින් සිටියත් බංග්ලාදේශය සත්කාරකයන් වීමත්, පසුගිය වසරේ පෙබරවාරි වන විට පාකිස්තානය (7) ශ්‍රේණිගත කිරීම් අනුව ඉදිරියෙන් සිටීමත්, හේතුවෙන් ඍජුවම ලෝක කුසලාන තරගාවලියට එක් විය.
පසුගිය වසරේ පැවති ලෝක කුසලාන තරගාවලියේ මුල් කණ්ඩායම් 6 අතරට එක්වීමට නොහැකි වීම නිසා ශ්‍රී ලංකාවට සුදුසුකම් ලැබීමේ තරගාවලියට ක්‍රීඩා කිරීමට සිදු විය.
කෙසේ වෙතත් එංගලන්තයට සහ දකුණු අප්‍රිකාවට එරෙහිව මෑත කාලීනව හිමිකරගත් ජයග්‍රහණ මෙන්ම ආසියානු ක්‍රීඩා උලෙළේදී රිදි පදක්කමක් දිනා ගැනීම ශ්‍රී ලංකා පිල ගැන අවධානය වැඩිවීමට හේතුවී තිබේ. මෙවර තරගාවලියේදී ස්කොට්ලන්තයෙන් සහ තායිලන්තයෙන් ශ්‍රී ලංකා පිලට සැලකිය යුතු මට්ටමේ සටනක් හිමි වනු ඇතැයි විචාරක මතය වී තිබේ.
